امسك حرامى بسرعة
الحق نصاب قبل مايهرب
السفر ،الغربة ،الهجرة، الإقامة
تعددت أسماءهم والسرقة مبدأهم
اختلفت تصنيفاتهم والنصب سبيلهم
مش عارف ليه معظمنا كشباب مصريين فاقدين الأمل خالص فى
بلدنا او الاستقرار فيها
لو سالت اى حد هتلاقى اللى نفسه يسافر اوربا او اللى مقدم على هجرة حتى كتيير بيحاول يهرب وهو عارف انه ممكن يموت
المهم يحاول
ايه السبب الى يخلى الواحد يضحى بروحه مقابل انه يخرج من بلده !!!!
بلد ليها العجب وناسها أعجب
كنت مرة فى حوار مع دكتور صيدلى وانا لسه فى الجامعة
الحوار كالاتى :
الدكتور ـ:ناوى تعمل ايه بعد الجامعة؟
انا : ان شاء الله هسافر
هو:ليه ، مش هتشغل هنا ؟!
انا : وهى البلد فيها شغل
هو : انت دورت على شغل وملقتش؟!
انا :لا
هو:عندك مشروع عايز تعمله وملقتش حد يساعدك؟
انا :لا
هو عندك فكرة تحب تنفذها ؟
انا :لا
هو :فكرت انك تشتغل فى مجالك اللى درست فيه؟
انا :لا
هو :اومال ازاى تقول مفيش شغل
لاعندكم افكار ولاحتى بتحاولوا
العيب فيكم مش فى البلد
قبل ماتلوموا على حال البلد لوموا على نفسكم
وختم الحوار وقالى ربنا قال وفى (السماء رزقكم وماتوعدون)
يارب تكون فهمت .
السفر بالنسبة لى كان زى عقيدة
حلم بحققه
حاجه بتهرب بيها من الواقع
السفر له ضريبة وضريبته غالية اوى
إنت بتاخد من البلد اللى بتسافر ليها فلوس
وهى بتاخد منك عمــــــــــرك
بحسبة بسيطة تقدر تعرف انت كسبت ايه وخسرت ايه
وهتلاقى خسارتك اكتر بكتير
فى دقيقة واحدة هتعرف قعدت أد ايه فى بلدك وبين ناسك
وضيعت اد ايه فى غربتك وهتلاقى الفرق شاسع
كنوز الدنيا متساويش يوم العيد بين أهلك وناسك
فلوس الدنيا كلها متغنيش عن غيابك فى شهر رمضان
وافتقاد المودة والبعد عن روحانياته
مفيش حاجه ابدا هتعوضك عن غيابك عن حد مريض
فقدانك حد قريب وانت بعيد
الغربة إدمان والسفر وهم ووسيلة سهلة للهروب
كله عارف انه هيدفع الثمن وكله عامل فيها من بنها
تحية لكل شاب قرر انه ميسبش بلده لأى سبب
تحية لكل شخص فى وطنه للنهاية
تحية لكل مكافح فى وسط أهله وناسه
بنفقد حاجات واحنا مش واخدين بالنا
وبعدين نبدأندور عليها ومش بنلاقيها
وفى الأخر نشوفها من بعيد نجرى عليها
اول مانقرب منها بتخرج لسانها ووقتها بس نتاكد انها فقدت القيمة
مــــــــــــِـ الآآخر
لو بتحسبها بالفلوس تبقى خسران
ولو بالانجازات تبقى ملهاش قيمة
ليست هناك تعليقات:
إرسال تعليق