مشكلة الدكتور محمد مرسى انه مش حاسس انه رئيس
ناقصه الهيبة عايز يثبت نفسه ناقص يمشى فى الشارع ويقول أنا الرئيس
الاخوان بيمشو بأمر المرشد
والمعارضين يهتفو بسقوط المرشد
طيب فين الرئيس؟!
للاسف ملوش وجود ملوش اعتبار عند اى حد ودى الحقيقة
الرئيس ده مش بيخوف ولا بيرعب ولا يقدر يتناقش ولا عنده حلول ولاكاريزما ومش قادر يحتوى الناس ومش عارف يقنع حد
طب هو ليه كدا او ليه الناس شايفينه كدا
يمكن السبب الاقوى لانه من جماعة الاخوان المسلمين والشائع عنهم مبدا السمع والطاعة الكل ينصهر فى الجماعة والولاء والبيعة للمرشد
سبب ثانى ان دكتور محمد مرسى لم يكن مرشحا رئيسيا للجماعة اللى هو منها وده فرق كتير لان انت فى جماعتك مكنتش اختيار رئيسى مجرد كارت احتياطى وده له دلالة طبعاً
دكتور محمد مرسى مش سياسى وعايز يعمل كل حاجه فمش هيعرف يعمل اى حاجة
ماشى بمبدأ الإقصاء وابعاد المعارضة واصحاب الرأى بيختار على مبدأ الموالاة رئيس وزراء مش مقنع مش مخضرم
وزراء مش على المستوى فى فتره حرجه وانت عارف ان العيون كلها مفتحة والشعب مش ناقص والاحوال زى الزفت
التقديس من جانب الموالين للرئيس
تقديس يكاد يصل إلى حد الألوهية تقديس جعله فى نظر المعارضه اشبه بالفرعون
دكتور محمد مرسى نجح بفارق بسيط جدا وشفيق كانت اصواته عاليه جدا اذا لم يجمع الشعب كامل على الرئيس فى ناس مش عايزينك فى كتير انتخبوك مش عاجبهم اداؤك فى كتير من الشعب مش راضى عن الوضع ومش حاسس باى تغيير
مش كل الشعب فلول ونغمة البلطجية والمندسين قديمة اوى
وملهاش لازمة وانتخابك لايعنى استبدادك
الإعلان الدستورى القشة التى قصمت ظهر البعير
بيفكرنى بوثيقة السلمى التى اشعلت الجحيم وباعلانات المجلس العسكرى التى كانت تمثل الاستبداد
سياسة اللامبالاة
فى الاول المطالب بتكون محدودة ومعقولة بعدين الامور تتطور وبعدين تخرج عن السيطرة وللاسف هو ده اللى حصل
وللاسف بردو مفيش حد بيتعظ ولا رئيس بيذاكر تاريخ كويس
لكِ الله يامصر
ليست هناك تعليقات:
إرسال تعليق