الأخت العزيزة ذات المنديل الأخضر ، اهديكي ارق التحيات واحب اعرفك بنفسي انا صلاح عبد السلام الغرباوي دبلوم صنايع ، شاطر جدا في الخراطة ، لكن مكسبي كان مكفيني بالعافية ، خصوصا وانا عندي احلام كبيرة ، فدخلت السجن عشان ابني مستقبلي واكون نفسي ، الصراحة انا كنت مهموم وحزين لكن راحت همومي لما شوفتك وشوفت اللون الأخضر بين أيديكي ، ربنا يجعل سنينك كلها خضرة وختاماً اتمني لكي السعادة وراحة البال المخلص ليكي صلاح ..
****
يا عم صلاح اية حكاية انك دخلت السجن عشان تبني مستقبلك ..؟! طب ازاي عايزة افهمها دي ، فايزة ..
****
فايزة ،، انا شايل تهمة عن واحد كبير نظير انه يأمنلي مستقبلي ، واتحكم عليا بعشر سنين ، لكن انا ناوي اخرج في نص المدة ، لاني بعيد عن المشاكل والشغب وانا متشكر جدا انك اهتميتي بيا ، ودة دليل انك انسانة وقلبك طاهر وعلي فكرة ، انا عمري ما هسألك انت دخلتي السجن بتهمة اية ، لكن يهمني اعرف محكوم عليكي بأد اية ..؟
****
أخي العزيز صلاح ، انا اسمي فايزة حسن ، كنت في الجامعة وكان فاضلي سنة واتخرج ، لولا انه اتحكم عليا بـ3 سنين قربوا يخلصوا ، عقبالك ،، انا فكرت في طريقة نقدر نشوف بيها بعض من قريب ، اطلب منهم يشغلوك نباطشية عيش ، انت عارف ان سجن النسا مفيهوش فرن ، والعيش بناخده من سجن الرجال ، وانتم كل يوم بتشيلوا العيش لغاية البوابة ، بوابة سجننا ، سجن النساء ، انا هكون في النباطشية الي بتستلم منكم ، بالطريقة دي نتقابل عند البوابة ، بس احنا منعرفش شكل بعض ، سهل انك تعلم نفسك بعلامة ، واعلم نفسي بعلامة ، ولا اقولك بلاش تعلم نفسك بعلامة ولا انا كمان ونشوف اذا كنا هنعرف بعض ولا لا ، لو عرفنا بعض يبقي ارواحنا موافقة بعض ، ولو توهنا عن بعض ، يبقي يا دار ما دخلك شر ، سيبني اعرفك بقلبي ، وتعرفني بقلبك ..
****
بس انا عاتب عليكي ، لية خبيتي عليا انك بالجمال ده .؟!
****
صلاح ، لازم تعرف انا دخلت السجن لية ..
****
صدقيني انا مش عاوز اعرف ، كل الي انا عاوزة دلوقتي ان المسافة الي بينا تصغر ، نفسي اسلم عليكي ، نفسي المسك ..
****
وانا نفسي اشوفك من قريب وحاسه اني هلاقي طريقة ان شاء الله
حلووو
ردحذف