- حضرتك مش فاكرنى ! ، أنا مجدى عز العرب الصحفى اللى حققت معاه واتهمتنى باثارة الرأى العام والعمل على قلب نظام الحكم
- لا مش فاكر
- طبعاً معذور ، هتفتكر مين ولا مين
- حضرتك عايز ايه دلوقتى !؟
- أبداً مجرد دردشة
- أسف .. مش فاضى
- هو حضرتك بتشتغل حاجة بعد ماطلعت عالمعاش ؟
- حاجة غريب أوى ! .. جرسون
- واحد قهوة لو سمحت .. أنت عارف التهمة اللى لزقتهالى ! ، كانت ممكن ترمينى فى السجن شهور وسنين لولا بعض المسئوليين فى الدوله اللى يعرفونى كويس وقفوا جنبى لحد مانتهى الموضوع ، انتهى الموضوع وجوايا سؤال محيرنى .. أنت كنت بتعمل كدة ليه !؟.. بتدور على شهرة اومجد او ترقية ولا علاوة .. وايه اللذة الغريبه اللى بتلاقيها لما تلفق لواحد تهمة !
- لذة أيه ياراجل انت ! .. أنا شغلى انى احمى البلد
- ومين اقنعك ان التصرفات دى هى اللى تحمى البلد ، ومين اللى فهمك اصلاً أنك اكتر وطنية منى او من اللى قبضت عليهم !؟
- لا .. اقف عندك ، انا مسمحلكش باللهجة دى
- طبعاً مش متعود عالمناقشة ، متحبش تسمع الا صوتك وبس
- هو ده اسلوب المتطرفين
- شايف اديك منحتنى تهمة جديدة ، طبعاً .. تشكيلة التهم متوفرة عندك ، ولو كنت دلوقتى فى مكتبك ، قاعد على كرسيك وسط الهيلمان والسلطة كانت الاقوال اترصت والتقارير اتكتبت ،والف حسرة عاللى يقع تحت ايدك
- انا خدمت البلد .. ولولايا كانت الفوضى خربت كل حاجه .. أحنا ياحضرة الصحفى فى حالة حرب ، ومسئوليتنا حراسة البلد من الاعداء
- الحرب الحقيقية احنا عارفين جذورها واطرافها .. أنما الحرب اللى انت بتتكلم عليها مش موجودة الا فى تفكيرك وتفكير اللى زيك ، انتم اخترعتوها علشان توقعوا الناس فى بعض وتلخبطوا الحاكم وتشغلوا الناس باعداء وهميين !
- أنت اكيد عميل اجنبى
زوجة رجل مهم
فيلم سينمائي مصري إنتاج سنة 1987 بطولة أحمد زكي،ميرفت أمين، علي الغندور،محمد الدفراوي
تصوير محسن أحمد قصةوسيناريو وحوار : رؤوف توفيق موسيقى تصويرية : جورج كازازيان مونتاج نادية شكري
إخراج : محمد خان
ليست هناك تعليقات:
إرسال تعليق